.

.

恥笑去蔣捧毛　人人做《開羅宣言》主角 

李八方

.




劉江金句版

.


成日敦促日本正視侵華歷史、批評日本竄改教科書嘅中國共產黨，其實自己咪一樣成日竄改歷史，除咗拒絕正視六四屠城外，抗戰歷史一樣係中共成日竄改嘅題目，好似解放軍八一製片廠參與拍攝嘅二戰電影《開羅宣言》，宣傳海報竟將開羅會議主角之一，國民黨蔣介石換做共產黨毛澤東！呢單嘢唔只俾國內外笑到面都黃，仲有網民整咗個海報萬能Key，等平民百姓都可以做《開羅宣言》嘅主角。

.

有網民整咗個《開羅宣言》海報製作網站，只要登入thisaba.com/cairo/，唔只冇去開會嘅毛澤東都可以現身開羅，任何人都可以！好似有網民安排人氣「迷你兵團」佔領開羅會議，社民連梁國雄亦都整番張戴住黑照嘅型格相扮開會、連影后吳君如都「被開會」。八方試過呢個萬能Key，幾好玩㗎，只要求其整張相上去，放大縮小任君選擇，總之一定幫你寫進歷史，同毛主席一樣咁威水。

.




原   版

內地電影《開羅宣言》海報將開羅會議主角換做毛澤東。




國共合作版



迷你兵團版





黑超長毛版

.

官  媒   都   頂  唔  順

呢張電影海報歪曲歷史遭廣泛報道，就連喉舌《環球時報》都辣㷫埋。《環球時報》噚日發表題為「《開羅宣言》海報帶來的印象令人擔心」嘅評論員文章，話對海報引發「輿論的不滿聲不絕於耳」，「存毛去蔣」是「公然違背歷史事實」，令人「誤讀很難免」。文章批評片商，如果想借電影弘揚「正能量」，實際效果恐怕係相反。難怪有網民話，「最能說假話的《環球》都看不下去」。法新社噚日亦以「中國電影被網上批評歪曲歷史」為題報道，話毛澤東根本冇出席過開羅會議，網民就透過惡搞海報嘲笑電影公司。

.

李八方          pf_lee@appledaily.com

.

.

.