成日話自己幾咁學術，幾咁嚴緊，原來都係借個學者名嚟吹水。

第一，佢個系統一定要用身份證號碼加手機去登記。我都唔計當中有幾多人用假身份證號碼去種票，但你手機發短訊呢個過程一定無得作，因為一定要經電訊商。咁而家csl都出埋報告係得62.8，減返要用手機登記嘅投票數字，多咗成10萬人出嚟。記者都講喇，一個行電腦程序計出嚟嘅數，又唔洗你一張張咁點，點會多咗10萬票。講真，你話差距係100之內都算，我當你齊頭。

第二，其實當中有幾多係我頭先所講，真係用作出嚟嘅身份證號碼(網上大把ID Generator)去做假，又係無人知。其實好簡單，香港大把人有兩部電話，你平時返大陸用張一卡兩號都有多一個香港號碼，啲人去旅行買張儲值卡又有多一個。之前網上都有傳好多人偷偷地用咗佢阿公阿婆個號碼去用app投票，蝦個老人家唔知自己投咗。

第三，其實仲有一個問題，就係點解莫乃光會有份參與。成個項目，唔係應該由港大民研團隊做O架咩。即係中大做個醫學研究，無拿拿唔通搵阿毛姐去畀意見。其實好明顯，就係佢哋成班泛民根本就蛇鼠一窩，每個人都掛個身份，最後目的就係要搞香港。莫乃光仲係神算，早就估到有80萬人會投票。聽日恒指升定跌，問佢咪得囉。

第四，之前爆出網上有人傳咗啲投票者資料出來，咁你鍾庭耀就話加密咗，乜乜物物，無可能解到出嚟。點知完來又係吹水，星島報出嚟，話「Sister Annie其後再引述電腦專家，指投票系統使用的軟件Encryption，加密程度「差不多完全沒有用」，不相信港大的教授不能察覺到問題。」

最後，文匯呢一段仲講，鍾庭耀明知收錢唔可以唔講名，最多係你講咗名，我保密，但佢仲同大學講，話一直都無咁嘅規定。成個項目85萬，有80萬係個委托方，佔中三子嘅朱耀明俾錢，大佬，咁都唔申報，仲要扮到係好獨立咁，佢真係假到無朋友。成件事其實只係一個包裝得好好，但揭開咗只係成班泛民搞事友，合謀作一個大故仔出嚟坤學生，坤市民。
http://paper.wenweipo.com/2014/10/29/HK1410290002.htm